ໄທເປັນໝາຍເລກ1 ໃນບັນດາ 10 ປະເທດທີ່ເຂົ້າມາທ່ຽວລາວຫຼາຍສຸດປີນີ້
ອີງຕາມຂໍ້ມູນຈາກ ກົມພັດທະນາການທ່ອງທ່ຽວແຈ້ງໃຫ້ຮູ້ວ່າ: ໃນຕະຫຼອດ 6 ເດືອນຜ່ານມາແມ່ນມີ
ນັກທ່ອງທ່ຽວເຂົ້າມາຢ້ຽມຢາມ ສປປ ລາວ ຈາກຫຼາຍປະເທດໃນທົ່ວໂລກ ຊຶ່ງນັບເປັນຕົວເລກ
1.674.436 ເທື່ອຄົນ.
ໃນນີ້ ນັກທ່ອງທ່ຽວ 5 ອັນດັບຕົ້ນທີ່ເຂົ້າມາທ່ຽວລາວຫຼາຍທີ່ສຸດ ຄື: ໄທ, ຫວຽດນາມ, ຈີນ, ສ. ເກົາຫຼີ ແລະ ອາເມລິກາ.
ສຳລັບພີ່ນ້ອງຊາວໄທແມ່ນອີງໃສ່ສະພາບຈຸດພິເສດທີ່ຢູ່ຮ່ວມຊາຍແດນກັບ ສປປ ລາວເຮົາ ດ້ານພາສາປາກເວົ້າຮີດຄອງປະເພນີຄ້າຍຄືກັນ ຈິ່ງເຫັນວ່າ ໃນ 6 ເດືອນຜ່້ານມານີ້ ພີ່ນ້ອງຊາວໄທເຂົ້າມາທ່ຽວປະເທດເຮົາຫຼາຍທີ່ສຸດມີເຖິງ 668.595 ຄົນ ຮອງລົງມາແມ່ນຫວຽດນາມ 398.937ຄົນ ແລະ ສປ ຈີນ 317.604 ຄົນ.
ແລະພາບຫຼ້າສຸດໃນມື້ນີ້ 27 ກໍລະກົດ 2023 ເນື່ອງຈາກເປັນວັນພັກຍາວເຖິງ 6 ວັນຢູ່ປະເທດໄທ ທີ່ດ່ານສາກົນຂົວມິດຕະພາບລາວ-ໄທ1 ວຽງຈັນໜອງຄາຍແມ່ນຄືກຄື້ນເປັນພິເສດ ໜາແໜ້ນໄປດ້ວຍນັກທ່ອງທ່ຽວ ເຫັນພາບແບບນີ້ແລ້ວຊື່ນໃຈອີຫຼີ ຂໍໃຫ້ພີ່ນ້ອງຊາວລາວຈົ່ງຊ່ວຍກັນເປັນເຈົ້າພສບທີ່ດີ ຕ້ອນຮັບແຂກບ້ານພີ່ເມືອງນ້ອງໃຫ້ເພິ່ນປະທັບໃຈ.
ທີ່ມາ: ຂ່າວເສດຖະກິດ-ການຄ້າ Lao EconomicDaily