ພາບທີ່ບີບຫົວໃຈເຫຼືອເກີນ ແຕ່ມັນເກີດຂຶ້ນ ມີແຕ່ເອົາເປັນບົດຮຽນ, ປະສົບການ ແລະ ແກ້ໄຂ ສູ້ຕໍ່ໄປ ມື້ອື່ນເຮົາຍັງມີລຸ້ນເຂົ້າຊີງອັນດັບ 5 ຈາກ 32 ທີມເຂົ້າຮ່ວມ ເຊິ່ງ U12 W.I.G NAGA ທີມຈາກ ສປປ ລາວ ເປັນທີມດຽວຈາກ 8 ທີມຕ່າງຊາດ ທີ່ຜ່ານເຂົ້າມາເຖິງຮອບ 8 ທີມສຸດທ້າຍ, ສ່ວນ ມາຊິດະ ທີມດັງຕົວເຕັງຈາກຍີ່ປຸ່ນ ກໍຕົກຮອບແບ່ງກຸ່ມ, ເຊັ່ນດຽວກັບອີກ 6 ອີກຈາກ ສປ ຈີນ 2 ທີມ, ໄທ 2 ທີມ, ຮົງກົງ 1 ທີມ ແລະ ຕີມໍ 1 ທີມ ກໍຕາມຈອດໃຫ້ທີມເຈົ້າພາບ ທັງໝົດໃນຮອບແບ່ງກຸ່ມ.
ນັດນີ້ U12 W.I.G NAGA ແຊັມກຸ່ມ E ພົບກັບ PYEONTAEK ແຊັມກຸ່ມ F ໃນຮອບ 8 ທີມສຸດທ້າຍ ຫຼື ດິວິຊັນ 1 ໃນການແຂ່ງຂັນບານເຕະ JS CUP 2023 ຫຼື Ji-Sung Park International youth Cup 2023 ທີ່ປະເທດເກົາຫຼີໃຕ້ ໃນມື້ນີ້ວັນທີ 24 ກໍລະກົດ 2023
ໃນຕົ້ນເກມເປັນ ທີມຈາກເກົາຫຼີ ຄອງເກມໄດ້ເໜືອກວ່າ, ແຕ່ ເອກະລາດ ວິໄລກຸນ ກອງໜ້າຕົວເກັ່ງຫົວໜ້າທີມຂອງ U12 W.I.G NAGA ຍິງປະຕູຂຶ້ນນໍາໃຫ້ກັບທີມໄປກ່ອນ 1-0 ກ່ອນທີ່ທີມຈາກລາວ ມາຜິດພາດ 2 ຈັງຫວະຖືກ PYEONTAEK ແຊງຂຶ້ນນໍາ 2-1. ຢ່າງໃດກໍ່ຕາມ, ໄລຍະທ້າຍ ໄທເກີ ຫຼື ເອກະລາດ ຈ່າຍທະລຸຊ່ອງສຸດງາມໃຫ້ກັບ ວິລຸດ ຍິງປະຕູຕີສະເໝີໃຫ້ກັບ U12 W.I.G NAGA ໄລ່ມາເປັນ 2-2 ຫຼັງຈາກນັ້ນຈະເປັນທີມຈາກລາວ ທີ່ຄອງເກມໄດ້ທັງໝົດ ແລະ ມີໂອກາດຍິງຕໍ່ເນື່ອງ ແຕ່ບໍ່ດີພໍທີ່ຈະເປັນປະຕູຈົບເວລາປົກກະຕິສະເໝີກັນ 2-2.
ເຮັດໃຫ້ຕ້ອງໄປດວນຈຸດໂທດເປັນ U12 W.I.G NAGA ທີມຈາກລາວ ຍິງພາດໄປ 2 ຄົນ, ສ່ວນ ທີມເຈົ້າພາບ ຍິງພາດໄປ 1 ຄົນກ່ອນເອົາຊະນະ ທີມຈາກລາວໄປ 3-2.
ຂ່າວ-ຮູບຈາກ: Larh Creators